Acuntéssia Bellomonte: agoa de 26 diris si serrat s’isciòpiru de su fàmini. Cras sit in in Casteddu

(IlMinuto) – Casteddu, 7 de su mes'e argiolas - S'at concluiri oi a mesunoti agoa de 26 diris de fil'e pari de mobilitada, s'isciòpiru de su fàmini po pediri su spresonamentu luegu de Bruno Bellomonte, su dirigenti de a Manca pro s’Indipendentzia e sindacalista de duus annus e 28 diris in presoni po mori de acusas chi no funt stetias mai cumprovadas. Is 26 diris de isciòpiru de su fàmini promòvius de su Cumitau "lavoratori pro Bellomonte" - oi no papant Gianluca Carta, Antonello Turra e Paola Alcioni – ant essi sighius cras a is 10.00 de una cuferéntzia de imprenta sit in a fac'e sa sedi de su Consillu regionali, in Casteddu. Su sit in est stetiu aprontau de su "Cagliari social forum", de s'Osservatóriu po is diritus e is libertadis e de su Colletivu anticapitalista sardu. "Est foras de contu - si ligit in d-unu comunicau de imprenta - ca is personis, scéti asuba de simplis suspetus, potzant essi postas in presoni po duus annus e prus! No ddoi est nudda, nisciuna prova est stetia portada fintzas a immoi po unu reatu chi no s'est tentu". Sa nota de imprenta ammentat puru sa morti de Luigi Fallico, mortu in sa própriu cella su 23 de su mes'e maju, candu de ses diris teniat cun craresa is sinnabis de sa guta. "Pedeus - precisat su comunicau - chi si fatzat luxi asuba de sa morti de unu de is imputaus (Fallico) e chi si punant cussus chi no dd'ant donau agiudu". A sa cosa fintzas a immoi ant a participai Sinistra critica sarda, Su cumitau Pro Bruno Bellomonte, Prc Sardinna, Cobas, Usb Sardinna e Colletivu marxista-leninista Nùgoro. Sèmpiri in Casteddu, ma s'11 de su mes'e argiolas a is 11.00 a fac'e su Tribunali, s'at a tenni unu presídiu aprontau de a Manca pro s’Indipendentzia contr'a sa repressioni coloniali a cinc'annus giustus giustus de s'Operatzioni Arcadia. "A cinc'annus de s'arrasteddamentu  italianu - precisat aMpI - is militantis nostrus e is dirigentis funt ancora abetendi de cumprendi poita ant passau un'annu de vida a is arrestus biu ca su processu no s'est mai tentu e ca su spricullitu no est stetiu mai archiviau". De custa protesta IlMinuto nd'at a chistionai mellus cras a mangianu.