Acontéssia Equitalia. Interregogatzioni: "De sa Regioni 10 milionis de eurus liaus a risorsas po contrastai a sa poberesa".

(IlMinuto) – Casteddu, 18 de su mes'e argiolas - Is risorsas chi sa Giunta regionali at stantziau po afrontai s'apretu "Equitalia" (dexi milionis de eurus) no bastant po nudda - su dépidu in totu est de 600 milionis - e po su prus custu dinai est stetiu liau de is risorsas po contrastai a sa poberesa. Est cantu denuntziat un'interrogatzioni presentada in is diris passadas in Consillu regionali. Primu firmadora de su documentu est Claudia Zuncheddu (indipendentistas). S'interrogatzioni est stetia firmada de is consilleris regionalis Uras (Sel), Ben Amara (Comunistas), Cugusi (Sel) e Sechi (Sel). Segundu s'interrogatzioni est "una bregúngia i est un'incomudu" chi sa Regioni "ndi liit su dinai a chini est giai poberu po ddu donai a is poberus nous, dinai chi iat a podi essi pigau de àterus capítulus de bilantzu in logu de cussu asuba de s'ispesa sotziali chi at giai biu irminorigamentus mannus". Cali est sa solutzioni po s'acontéssia "Equitalia"? S'interrogatzioni proponit a sa Regioni de si dotai de "una aina regionali po s'incàsciu de is pagamentas e de is intradas, est a nai un'aina chi cumpredat de prus is istrobus económicus e sotzialis".