Traballu: Assessori Cordeddu a s'amministratzioni noa de Casteddu: "torrai a biri s'apaltu chi no amparat a is operadoris i a is personis chi tenit handicap

(IlMinuto) - Casteddu, 8 de su mes'e làmpadas - "Pedeus debressi un'atóbiu apretosu cun s'amministratzioni comunali noa po podi torrai a biri is cunditzionis de apaltu chi no amparant po nudda a traballadoris i a is citadinus chi tenint handicap". Cun custus fueddus s'assessori provìntziali de su Traballu, Lorena Cordeddu, espressat "apinnicu mannu po sa situatzioni de is traballadoris de su Comunu de Casteddu, po sa chistioni de s'apaltu de assistu a domu in faori de chini tenit handicap o de chini sunfrit de maladias mentalis". De sa cosa s'est chistionau in is diris passadas in d-un'atóbiu tra su rapresentanti de sa Giunta provintziali e is rapresentantis de sa Fp Cgil, de sa Cisl Fps e de sa Uil Fpl. S'apaltu nou - est stetiu denunciau in s'atóbiu - ponnit a arriscu diversus postus de traballu e abasciat de gradu a is operadoris de su cumpartu trisinaus in sa chistioni. "No si podit firmai un'acórdiu de custu tipu - precisat s'assessori Cordeddu - in custu mamentu de crisi económica grai s'obbietivu depit essi sèmpiri cussu de assegurai a is traballadoris i a is traballadoras sa possibbilidadi de sighiri su traballu insoru cun profetu [...], prusatotu po lassai arta arta sa calidadi de su serbítziu a is citadinus chi tenint handicap".