“Bruno liberu!”. In 500 in Tàtari po pediri de libberai a s’indipendentista de aMpI. Cumentzat s’isciòpiru de su fàmini

(IlMinuto) – Casteddu, 13 de su mes'e làmpadas - "Bruno Liberu!". Funt stetias pagu prus de 500 is personis chi sàbudu a merì ant manifestau in Tàtari po pediri de liberai a su dirigenti de a Manca pro s’Indipendentzia, Bruno Bellomonte, a duus annus de s'arrestu. A sa protesta - aprontada de aMpI - ant aderiu Paris, Sardigna Natzione e ProgRes, Pcl, Sinistra Critica Sarda e Rifondazione comunista.

Su corteu, tucau de s'Emiciclo Garibaldi, at fattu duas frimmadas fundamentalis: sa frimmada a fac'e s'istatzioni ferroviaria de Tàtari (Trenitalia at lissentziau a Bellomonte in su mes'e maju de su 2010 chen'e abetai nemmancu su rinviu a giudítziu) i a fac'e su Tribbunali, innoi sa boxi de aMpI, Cristiano Sabino, at denunciau ancora una borta a sa cundenna chi pensat in is pabas de s'indipendentismu sardu po manu de su stadu italianu . Sa manifestada tataresa in Casteddu est stetia precedia de una cuferéntzia de imprenta cun sa participatzioni de Claudia Zuncheddu (consilleri regionali), Giuseppe Andreozzi (Osservatóriu po sa libertadi contr'a sa repressioni), Marco Peltz (aMpI), Antonello Tiddia (Cumitau 'lavoratori pro Bellomonte'), Salvatore Drago (Colletivu anticapitalista sardu) e Caterina Tani (pobidda de Bellomonte). "No ddoi est una prova. Bruno Bellomonte - at acrarau Tani a is giornalistas - no est imputau po cussu chi at fattu, ma cussu chi est. Unu comunista e un'indipendentista". Peltz at ammentau a Luigi Fallico, sciamau de s'imprenta e lassau morri in d-una cella de su presoni de Viterbu candu teniat totus is intzimias de sa guta. "Fallico - at nau su rapresentanti de aMpI - est stetiu cundennau a morti in abetu de giudítziu".

In sa cuferéntzia est stetia presentada puru una forma de lota noa, fatta po no ndi studai s'atentzioni de s'acuntéssia Bellomonte: s'isciòpiru de su fàmini a "staffetta", a custu ant aderiu Antonello Tiddia, Matteo Curridori e Patrizio Carrus. A sa segundha "staffetta" torrant a participai Tiddia e Curridori, afiancaus de Sayli Vaturu.