Acuntéssia Bellomonte: ses diris chen’e papai po pediri de liberai a s’indipendentista. Su commentu de aMpI asuba de su corteu de Tàtari

(IlMinuto) – Casteddu, 17 de su mes'e làmpadas - Est arribbau a ses diris s'isciòpiru de su fàmini a stafeta po pediri de liberai debressi a Bruno Bellomonte, su dirigenti de a Manca pro s’Indipendentzia de duus annus in impresonamentu cautelari po mori - acrarant is aprontadoris - "de unu teorema chi no tenit ni conca ni peis, comenti si bit de su sboddiamentu de su processu". S'isciòpiru de su fàmini, promòviu de su Cumitau "Lavoratori pro Bellomonte", est cumentzau su 12 de su mes'e làmpadas. Oi isciopirant Martino Orrù, Fabrizio Ortu, Sayli Vàturu (chi no papat de cincu diris) e Matteo Curridori (a sa sesta diri de filepari de isciòpiru). "Naraus gràtzias - cummentat su diretivu natzionali de aMpI - a chini in custas diris est fadendu s'isciòpiru de su fàmini a stafeta acotzendi sa bidea nàscia de su 'cumitau lavoratori pro Bruno Bellomonte' , chi de domínigu no funt papendi po donai sa solidariedadi insoru a sa presonia iniqua de su dirigenti indipendentista". aMpI donat unu giudítziu bonu puru a su corteu chi sàbudu passau at atravessau Tàtari tzerriendi "Brunu líberu!". "S'organizatzioni de sa manca indipendentista sarda A Manca pro s’Indipendentzia – si ligit in d-una nota - narat gràtzias a totus is indipendentistas e a is democraticus chi funt cabaus in pratza sàbudu 11 de su mes'e làmpadas po esígiri debressi su liberamentu de Bruno Bellomonte e po denunciai s'omicidiu de Luigi Fallico, imputau impari a Bellomonte, lassau morri a solu in d-una cella scéti po essi comunista".

Po a Manca sa manifestada de sàbudu est unu passu ainnantis in sa convergéntzia natzionali tra is fortzas indipendentistas (in Tàtari ant manifestau puru Paris, Sni e ProgRes). "Custus movimentus - precisat aMpI - ant arrespustu a s'apellu nostru po donai una priuxa indipendentista a sa manifestada custu at fattu in modu chi sàbudu Tàtari fessat atraversada de unu corteu de lota e no de una passillada umanitària".

"Naraus gràtzias - si ligit in sa nota - puru a sa fita cuscienti de sa manca italiana chi at decidiu de participai a unu corteu po su liberamentu de unu presoneri políticu de s'indipendentismu".

Po participai a s'isciòpiru de su fàmini e po ndi sciri de prus: tiddia.ant@gmail.com