Sa furriada de is 10milla. Artesanus e butegajus in Casteddu po nai nono a Equitalia

(IlMinuto) – Casteddu, 12 de su mes'e maju - "Agoa de un'agunia longa est mortu su Surcis. Equitalia e istudius de setori dd'ant bociu senz'e cuscéntzia". Custa furiat una de is scritas asuba de is  diversus cartellonis impugnaus de is manifestantis aprontaus de su "Movimento artigiani e commercianti liberi" chi custu mangianu ant manifestau in Casteddu. In 10milla ant tzerriau su disisperu insoru a fac'e su Consillu regionali, 10 milla personis aghillias de un'arringheramentu de pagu prus de 70 óminis de is fortzas de s'órdini in divisa 'e gherra. A su corteu - tucau prus o mancu a is 10.30 de su largu a fac'e sa Fiera - ant participau grupus de artesanus e butegajus de su Surcis-Igresienti (Masainas, Nuxis, Narcau, Mercau cívicu citadi de Igrèsias, Carluforti, Portescùsi, Crabònia), rapresentantis de su Mps, traballadoris de sa Rockwool e rapresentantis de su mundu políticu comenti Claudia Zuncheddu, Gavino Sale e Giampaolo Diana. A s'arribbu a fac'e su Palatzu de bia Roma una delegatzioni de is manifestantis est stetia arricia de su presidenti de sa Giunta regionali Ugo Cappellacci. Su "Movimento artigiani e commercianti liberi" pedit a su Guvernu s'arreconnoscimentu prontu de su stadu de crisi, su congelamentu de is cartellas de Equitalia e sa frimmada de is scicutas. De Facebook su rapresentanti commerciali de su Surcis Andrea Impera at fabbricau unu movimentu forti e biu. Est inútili - at nau Impera de su càmiu chi oberriat sa manifestada - chi circais de blocai sa pàgini nostra o sa posta eletrónica mia. Si seus liaus sa benda de is ogus e no eis a arrennesci a si frimmai".