Scontróriu. Osservatóriu: “No a s’arcivatzioni de su casu Fresi. Siant punius is responsàbbilis de sa pérdida de s’ogu”

(IlMinuto) – Casteddu, 29 de su mes'e arbili - Su 19 de su mes'e ledàminis de su 2010 su pastori Roberto Fresi fut fertu in is càrrigas de sa Politzia a fac'e su Consillu regionali, in Casteddu. Is ferias de s'allevadori furiant grais a su puntu de ddi causai, a pustis de una pariga de diris, sa pérdida de s'ogu. Ma immoi su casu iat a essi acanta de s'arcivatzioni. "Beneus a sciri de s'imprenta - denunciat s'Osservatóriu po s'amparu de is libertadis - ca su pm Deniela Caria iat a tenni intentzioni de dimandhai s'arcivatzioni de su protzedimentu penali obertu contr'a 'disconnotus' po su ferimentu de su pastori". "Casumai custa nova iat a currispundi a beridadi - precisat s'Osservatóriu - po nos iat at essi una cos'a 'e macus. Iaus agatai foras de contu sa dimandha de arcivatzioni po unu fatu aici grai, mentris, in su mantessi tempus si bolit sighiri su processu a is tres pastoris acusaus de resisténtzia a púbblicu uficiali sèmpiri po cussu chi est acontéssiu in sa mantessi diri". S'Osservatóriu dimandhat "beridadi e giustítzia" e narat de nono a s'arcivatzioni. "Dimandhaus - precisat s'Osservatóriu - chi su protzedimentu contr'a 'disconnotus' no bengat arcivau, e chi bengant avreguadas is responsabbilidadis de chini at strupiau in modu aici grai a Roberto Fresi [...]".