Record de disimpreu po sa Sardigna: in tres mesis pérdius 26.329 postus de traballu

(IlMinuto) – Casteddu, 4 de su mes''e arbili - In s'Ísula sighit s'emorragia de is postus de traballu. In is úrtimus tres mesis de su 2010 su tassu de disimpreu est aumentau de 2,3 puntus, passendi de su 12,4 a su 14,7 po centu: sa cifra fait de sa Sardigna - chi in custa classífica maba bincit a sa Basilicata e a sa Sicilia - sa regioni de Itàlia cun su tassu de disimpreu prus mannu. ddu fait sciri s'úrtimu númeru de "Congiuntura lavoro Sardegna", su periòdicu de s'Agentzia regionali de su Traballu. "Su IV trimestri de s'annu chi si seus lassau a is pabas de pagu - acrarat in s'editoriali su diretori de s'Agentzia Stefano Tunis - s'est serrau cun d-unu saldu negativu tra aviamentu e acabbu de traballu po 26.329 traballadoris".