Parchegius in Cuartu. Sinistra critica: "Pagamentas senz''e tenni unu serbítziu assegurau. Sa 'creatividadi' de Contini ferrit a is busciaca de is citadinus"

(IlMinuto) – Casteddu, 9 de su mes''e martzu - "Sa 'creatividadi' de sa Giunta ferrit a is busciacas de is cuartesus". Ddu denunciat cun d-una nota de imprenta su Cordinamentu provitziali de Sinistra Critica. "Po Cuartu Sant'Eleni, no ddoi est scèti su 'pranu arrépiu'  bófiu de primu citadinu - narat sa scuadra anticapitalista - issu aumentat puru su númeru de is parchegius a pagamentu in citadi e in su litorali. Ma sa 'fantasia' de Contini non tenit fini. Po unus cantu de citadinus, tra pagu tempus is cuartesus ant podi arribbai a pagai 40 eurus a s'annu po cicai parchegiu senz''e tenni sa segeresa de dd'agatai, est a nai ca ant a pagai una pagamenta senz''e tenni sa segeresa de unu serbítziu". Ma s'organizatzioni de sa Sinistra anticapitalista puntat su didu puru asuba de su determinu de scancellai a sa pista de is bicicretas de bia San Benedetto. "Asuba de cali lógica - si ligit in d-una nota - Contini aumentat su númeru de is parchegius a pagamentu e in su mantessi tempus scancellat a una de is pagus pistas de bicicretas chi s'agatant aintru de sa citadi?. De custu tema s'at a fueddai puru in su cuintu apuntamentu de Chistionis e Opinionis, chi at a bessiri cras in custu giornali.