Eletzionis comunalis in Casteddu: de aMpI "acotzu esternu" a Zuncheddu. ProgRes caminat a solu e presentat Demuru

(IlMinuto) – Casteddu, 25 de su mes''e martzu – A Manca pro s’indipendentzia at a cotzai a sa candidadura de Claudia Zuncheddu a síndhigu de Casteddu senz''e intrai a fai parti de s'alleàntzia de listas eletoralis, ma a dógnia modu assegurendi un'"acotzu esternu" a su progetu indipendentista presentau ariseru in cuferéntzia de imprenta. Est cantu precisat cun d-una su Diretivu natzionali de aMpI. "No eus a fai mancai - si ligit in d-una nota de imprenta - s'acotzu nostru a custu signali de importu mannu de unidadi natzionali, puru si pensaus chi s'acórdiu depat essi primu políticu e agoa eletorali. Necessidadi chi in su casu de Casteddu a dolu mannu est svanessia no po mori de sa bolontadi nostra. Auguraus, a is fortzas indipendentistas, chi funt impignadas in custu progetu de importu mannu, unu traballu bellu". Zuncheddu - acotzada de Irs, Sni, Malu Entu, Indipendetistas, Unidade, "Riprendiamoci Cagliari" e cun s'acotzu esternu de aMpi - no at essi perou s'única candidada indipendentista a síndhigu de Casteddu. At a curri po incàrrigu de primu citadinu ddoi at essi puru Ornella Demuru, acotzada de is indipendentistas de ProgRes.