150 annus de Itàlia. Sit in indipendentista a fac”e su Consillu regionali in setziada pomposa

(IlMinuto) – Casteddu, 16 de su mes''e martzu - Totus is sardus si cuncodrant a afestai a is 150 annus de s'unidadi de Itàlia? No po totus est aici. Si, po fai scéti calencunu esémpiu, su Consillu regionali s'at agatai in setziada pomposa po afestai a su séculu e mesu de istadu italianu e sa Cgil aprontat po custumerì in su Teatru Adriano de Casteddu sa "Notte tricolore", in Facebook s'incarat calencuna bandhera arrubia posta de chini preferit ammentai a is 140 annus de sa Comune de Parigi e is indipendentistas sardus si preparant a denunciai 150 annus de "colonialismu italicu". Sardigna Natzione at avisau po cras a manginu unu sit in de protesta, própriu a fac''e su Consillu regionali in bia Roma. "Eus a essi asuta de is pórcius de sa Regioni - acrarat su cordinadori de Sni Bustianu Cumpostu in d-una nota - po ammentai a totus ca s'istoria de su pópulu sardu at a andai ainnantis e tra no meda puru su volùmini chi tenit po títulu 'Sardigna Italiana' at pigai pruini in is parastàgius impari a 'Sardigna Punica', 'Sardigna Romana', 'Sardigna Pisana', 'Aragonesa', 'Spagnola'...e s'Itàlia at a passai de su presenti a su passau". Is comunistas indipendentistas de aMpI po cras, ant invecis avisau cuferéntzia de imprenta in sa sedi tataresa de bia Cetti, cun s'obbietivu de presentai, tra is àteras cosas, sa "positzioni de aMpi asuba de is 150 annus de s'unidadi de Itàlia". Malu Entu at invecis sceberau una forma de protesta insolita, ant a protesta in su satu. Cras is indipendentistas de Doddore Meloni "ant essi in Cùcuru Ampsicora po pediri perdonu a Ampsicora, Josto e a totus cussus chi funt mortus in is batallas contra a is Romanus e contra a totus is invasoris chi is séculus s'ant dominau".