Su círculu "Bussolai-Lussu" lassat a is Rossomori: "Segreteria atesu mada de s'indipendentismu"

(IlMinuto) – Casteddu, 25 de su mes''e fiàrgiu - Claudia Zuncheddu no est a sola. A pagu diris de is dimissionis de su consilleri regionali de su movimentu puru su círculu "Marianna Bussalai-Joyce Lussu" de Casteddu lassat a is Rossomori. Su círculu s'agat in disacórdiu mannu cun sa segreteria Muledda. "Cundividendi is arrexonis políticas de is dimissionis de Claudia Zuncheddu de Presidenti e de militanti Rossomori – si ligit in d-una nota - su Círculu cunsiderat serrada po sèmpiri custa esperiéntzia senzzi pàsiu, iscorada aintru de su movimentu etotu".

A sighiri a Zuncheddu funt totus is militantis de su Bussalai-Lussu impari cun sa boxi de su círculu Claudia Pibiri, sa cordinadora Stefania Agus e is consilleris natzionalis Silvia Salidu, Marina Masala e Cinzia Moro. Is indipendentistas ex Rossomori afirmat ca "s'atacu moviu de sa segreteria a s'atividadi istitutzionali mandada ainnantis cun coràgiu e dignidadi de sa consillera regionali e comunali Claudia Zuncheddu est un'atacu foras de contu" e denunciant "su distacamentu de sa segreteria Rossomori de su pensamentu indipendentista. Pensamentu chi no est stetiu mai digeriu de is capus mannus, de su Partitu, lindi a s'ex Presidenti ".