“Segura ma scabudada de ambasciada”. De su Cairu sa testimónia de un’arabista sarda. Cenàbara dibbatidu in Casteddu

(IlMinuto) - Casteddu, 9 de su mes''e fiàrgiu - "De otu diris, de candu sa politzia est sparessia e s'est ammesturada a is batzariotus e a is ex presoneris, biveus inserraus, óminis e piciocus in is istrada e féminas e pipus in is domus, atacaus a sa tv po is últimas novas". Aici scririt in www.affrica.org – su giassu chi in is diris de sa rivolutzioni rapresentat unu ponti tra Egitu e Sardigna - Laura Fara, arabista e e a oi impignada in s'istudiu de is línguas a s'Universidadi americana de su Cairu. "Puru si - sighit Fara - seu in d-unu logu apartau, m'intendu protegia de bixinus e amigus egitzianus puru si seu stetia scabudada de s'ambasciada e de su guvernu italianu chi [...] parrint de no essi interessaus meda a s'acontéssia". De is eventus chi in is últimas cidas bint comenti protagonistas a sa Tunisia, a s'Egittu e a su Yemen s'at a chistionai cenàbara in Casteddu (17.30, àula magna de Sciéntzias políticas) in s'atóbiu-dibbatidu "Il mondo arabo in fiamme". A s'eventu ant a participai Nicola Melis, maistu de Istoria e istitutzionis de su "Vicino oriente", s'Assótziu Sardegna-Palestina, e Omar Ghiani, giornalista e analista. S'atóbiu est aprontau de s'Assótziu Antonio Gramsci.