“Sa terra nostra bisonzat de la difendere”: po no si ndi scaresci de Angelu Caria

(IlMinuto) - Casteddu, 11 de su mes''e fiàrgiu - "[...] indipendentzia [...] bolit nai puru cumprimentu cuncretu de is princípius originalis de unu sotzialismu chi una casta de privilegiaus, sa classi de is dirigentis de is partidus chi guvernant a is istadus, iant acracangiau e pigau a befa".

Angelo Caria “Libertade!”, 1990.

At a benni presentada cras in Usini, a is 18.30 in su bar Sensos in pratza Europa, "Sa terra nostra bisonzat de la difendere": unu ligimentu musicau de is poesias de Angelu Caria. A 15 annus de sa morti, acontéssia su 24 de su mes''e fiàrgiu de su 1996, Caria bivit ancora in is fueuddus suus e in is pensus suus. Cussa de su leader indipendentista, difatis, est una vida "prena" de política. In su 1968, cometi marxista-leninista, est tra is fundadoris de s'organitzazioni e giornali "Stella Rossa". In su 1972, a pustis de sa laurea in literadura a s'Universidadi "La Sapienza" de Roma, torrat in sa Sardigna sua amada. De custu momentu cumentzant s'impignu senz''e pàsiu e s'interessu de Caria po sa chistioni natzionali e po s'autodeterminatzioni de su pópulu sardu. In su 1973 addirit a su movimentu, chi est bidenti in cussu momentu sa luxi, de "Su Populu Sardu", chi bolit s'"illoimentu sociali, económicu e linguisticu de un'Ísula libbera de is catenas colonialis de s'Itàlia". Concluida s'esperiéntzia de "Su Populu Sardu", Caria donat impari a àterus sa nascida a "Sardigna e Libertade" primu, e a pustis, in su 1984, a su "Partidu Indipendentista Sotzialista Libertariu", de custu iat essi su segretàriu. Agoa su partidu  cambiat su nòmini suu in "Partidu Sardu Indipendentista" scuadra custa chi s'impignat in is batallas contra a s'ocupatzioni militari de sa Sardigna e in favori de sa difesa de s'ambienti suu, contra a sa política de su ciumentu de is costas e contra a sa passada de is petrolieras in s'Istretto de Bonifacio. Sèmpiri in nòmini e in difesa de sa "Pàtria Sarda Stimada",  comenti dda lamàt cun amori, in su 1994 fundat cun Bustianu Cumpostu e àterus indipendentistas "Sardigna Natzione", unu movimentu chi nascit cun s'obbietivu de acumonai indipendentistas cun pensus políticus diversus.

A 15 annus de sa morti, sa sinistra indipendentista sarda bolit ammentai a Caria po mesu de is líricas suas, chi cras ant essi interpretadas de sa boxi de Marco Moledda e Vittoria Marras e alligradas de sa música de Giampietro Secchi. "Angelu Caria - si ligit in d'una nota de imprenta de aMpI - est stetiu unu furriadroxu po s'indipendentismu modernu e at arrexinau in su dibbàtidu chistionis chi funt oi etotu atualias [...]. Su diritu a sa soverania natzionali, su reconoscimentu de is diritus linguisticus e culturalis, sa necessidadi de mudai modellu de isvilupu económicu, cussa de tenni una flota natzionali sarda e de costruiri unu stadu sardu indipendenti e progressista".

A pustis de s'eventu culturali at essi serbiu un'aperitivu de prodotus de su logu.