Processu Saras. Costa (Cgil): “Recursu contra a s’esclusioni de sa Fiom sarda”

(IlMinuto) – Casteddu, 18 de su mes''e fiàrgiu - "Est un'aturdimentu mannu s'esclusioni de sa FiomCgil de su processu chi at a acrarai de chini funt is crupas de sa morti de is tres operàjus de sa Saras chi si ndi funt andaus su 26 de su mes''e majus de su 2009". Ddu at nau su segretàriu generali de sa Cgil Enzo Costa. Su sindacau at a presentai "debressi unu recursu contra a s'arrefudu chi at tentu sa dimandha de sa Fiom sarda de si costituiri parti Civili". Su 26 de su mes''e maju de su Daniele Melis, 29 annus, Luigi Solinas, 27, e Bruno Muntoni, 58 – traballadoris de sa Comesa, dita apaltadora de sa Saras - morriant allupaus po mori de su traballu in Sarròccu. In su mes''e ledàminis de s'annu passau sa Procura de sa Reprúbbica de Casteddu at pediu su rinviu a giudítziu po omicidiu curposu de parti de is capus mannus de sa Saras e de su rapresentanti legali de sa Comesa. Ariseu s'esclusioni de sa Fiom comenti parti civili. "Oi etotu - acrarat su segretàriu de sa Cgil - eus a pigai is atus e impari a is abbogaus nostrus eus a cuncodrai cussu de fai a manera chi sa Fiom bengat torrada a ammiti. Seguramenti no s'eus a frimai a is primus impícius".