Apuntamentus : cumentzat su "Campidano Film Festival 2011"

(IlMinuto) – Casteddu, 9 de su mes''e fiàrgiu - Mancant ancora pagus oras a cumentzai su "Campidano Film Festival". De su 12 de su mes''e fiàrgiu - inauguratzioni a is 18.00 - a su 6 de su mes''e martzu sa Domu de su Cínema-Museu de su Làrdiri Santu Sparau at a aghilliri a s'editzioni 2011 de sa manifestada. In programma un'interessanti arregorta de film e documentàrius de s'annu passau. Is proietzionis s'ant a tenni dógnia sàbadu e dógnia domínigu a is 21.00. Su progetu previdit puru duas matinée, fissadas po su 26 de su mes''e fiàrgiu e su 5 de su mes''e martzu a is 10.00 e dedicadas a is iscolas de su territóriu. Tra is diversus film in programma funt stetias sceberadas is òperas: “Cosmonauta” de Susanna Nicchiarelli, “Dieci Inverni...” de Valerio Mieli, “L’uomo che verrà” de Giorgio Diritti, “I gatti persiani” de Bahman Ghobodi, “Piombo Fuso” de Stefano Savona, “Macerie” de Giovanna Massimetti e Paolo Serbandini, “The Cove” de Louie Psihoyos, “Miral” de Julian Schnabel, “Il Concerto” de Radu Mihaileam. Is proietzionis, chi ant essi presentadas de Pia Brancadori, Luciano Marrocu, Alessandra Piras e Paola Trogu, no ant essi s'únicu ingredienti de su festival. Tres mostras, totus aghillias in sa Domu de su Cínema-Museu de su Làrdiri, ant a fai difatis de guarnícia a sa manifestada culturali. Seus fueddendi de "Flash Back", de "Antologica CliCiak Cinema Italiano Contemporaneo" e de "Alfonso Avincola fotografa Carlo Lizzani".

"Flash Back. Storia del cinema per immagini di Pablo Volta" at a arregolli is ritratus de is intèrpreti de su cínema internatzionali, fattus in Itàlia e in Franciain annus Cincuanta.

"Antologica CliCiak Cinema Italiano Contemporaneo" at a presentai unu sceberu de materialis de su cuncursu natzionali “CliCiak” arribbau a sa XXIII editzioni sua e dedicau a is fotògrafus de iscena italianus.

“Alfonso Avincola fotografa Carlo Lizzani” at aponni in mostra is set de is film de Carlo Lizzani.