UN ANN'ANNU FAIT. Acuntéssia Bellomonte: puru S’Alighera s'espressat po sa "territorialidadi de sa pena"

(IlMinuto) – Casteddu, 30 de su mes''e gennàrgiu de su 2010 – Puru S’Alighera s'espressat po sa “territorialidadi de sa pena”. In is diris passadas su consillu comunali de sa citadi catalana, gratzias a s’avansamentu de su rapresentanti de “Alghero Viva”, Valdo Di Nolfo, at aprovau a s’unanimidadi un’odg chi pedit s’arrespetu de sa lei 354 de su 1975 e su protocollu de intesa tra Stadu e Regioni de su 2006. In àula Di Nolfo at arregordau s'acontéssia de Bruno Bellomonte “citadinu sardu chi de otu mesis – scririt su consilleri – iscontat sa presonia cautelari a foras de sa Sardigna (primu in Roma e a pustis in Catanzaru) sighendi sa normativa ”. In is últimas cidas s'acuntéssia Bellomonte at torrau a tenni s’atentzioni de is “media” natzionalis e de su territóriu. “De pagu prus de dexi diris ligeus in is principalis giornalis de s’Ísula e in cussus italianus – osservat in d’una nota s’ufíciu de imprenta de aMpI – unus cantus noas chi chistionant de s’organizatzioni política nostra e de unu de is prus importantis dirigentis nostrus, Bruno Bellomonte. Si fueddat de nos po mori de un’inchiesta chi sa pulitzia política italiana at fattu po una presunta nàscida noa de is Brigate Rosse chi at portau a calincunu arrestu in Itàlia”. Ancora una borta – precisat su comunicau de imprenta – seus costrìntuns a arremaciai calincunu cuncetu elementari. Bruno Bellomonte est stetiu arrestau su 10 de su mes”e làmpadas de su 2009 cun s’acusa de bòliri torrai a ponni in motu is Brigate Rosse. De casi seti mesis est stetiu esiliau in sa galera italiana de Sianu (Catanzaru) aundi abetat assumancu chi ddi bengat donau s’arrespetu de sa territorialidadi de sa pena. S’organizatzioni nostra, a Manca pro s’Indipendentzia, est un’organizatzioni política indipendentista sarda e lotat po arribbai a tenni sa totali soverania de sa Sardigna, lotat po liberai a sa Sardigna de su Stadu Italianu. Bruno Bellomonte de su presoni italianu sighit a participai cun sa própriu resisténzia a custa lota. A nos no si torrat, a oi, ca is ex o post Brigate Rosse (sémpiri chi ddoi siant) apant tentu o tengant comenti obbietivu ideologicu cussu de intrai in sa lota de Liberatzioni Natzionali e nemmancu cussu de s’indipendentzia de sa Sardigna”.