“Sindrome di Quirra”. Cumpostu (Sni): “Sardigna Mururoa italiana”. Interrogatzioni de Claudia Zuncheddu (Rossomori)

(IlMinuto) – Casteddu, 5 de su mes''e gennàrgiu - "Sa beridadi donat strobbu ma no si podit prus cuai, sa Sardigna est sa Mururoa italiana. Cun is gherras simuladas su stadu italianu, comenti cussu francesu in Mururoa, sperimentàt in Sardigna armas e esplosivus chi bocint puru indiretamenti". Aici su cordinadori natzionali de Sardigna Natzione Indipendentzia, Bustianu Cumpostu, cummentat is datus de su monitoraggiu fattu de is veterinàrius de sa Asl de Casteddu e de Lanusè asuba de su Polìgonu interfortzas "Salto di Quirra": po 18 pastoris 10 (su 65 po centu), maladius de cancru a su sànguni. "Si ndi depint andai de Quirra - aciungit Cumpostu -, pagai is dannus e si nci depint andai. Sa preséntzia insoru no si podit prus agguantai, no scéti donat poberesa e fai ammaladiai su pópulu nostru, ma avelenat a su territoriu in modu malu meda e pagu recuperàbili". Asuba de sa chistioni fueddat puru Claudia Zuncheddu, presidenti de is Rossomori, cun d'un'interrogatzioni a arrespusta scrita presentada ariseru in Consillu regionali. "Po cali arrexonis - dimandat Zuncheddu - su spricullitu veterinariu esti stetiu fattu e bófiu scéti de pagu, cun totu chi fessat stetia giai apretada de una dexiana 'e annus de: sa genti 'e logu, famílias de is mortus civilis e militaris chi oberànt in s'area in chistioni, médicus e espertus de su cumpartu, Cumitaus impignaus de meda tempus a fai craresa asuba de s'anomalia de cussa chi si lamat 'Sindrome di Quirra'".