"Serbítziu psichiatricu trasferiu in s'istrutura carcerària. Poita?. Interrogatzioni Espa-Diana (Pd)

(IlMinuto) – Casteddu, 10 de su mes''e gennàrgiu - Sa chistioni de su Serbítziu psichiatricu de Diàgnosi e Cura 1 de Casteddu, trasferiu po su momentu in d'un'area de s'ispidali torrada a fai e atressada po aghilliri un'istrutura carcerària sanitària, arribbat in Consillu regionali cun d'un'interrogatzioni presentada de is democràticus Marco Espa e Giampaolo Diana. Is duus rapresentantis de su Pd dimandhant a su presidenti de sa Regioni, Ugo Cappellacci, e a s'assessori de sa Sanidadi, Antonello Liori, "cali funt is motivus chi ant portau a oi a pensai a un'"istrutura carcerària' comenti logu de acasàgiu de maladius chi sunfrint de malis a conca", "po cantu tempus ancora is maladius depint abarrai in cust'istrutura" e "ita tocat a fai debressi po torrai a ativai is istruturas adatas". "Una chistioni sanitària - iat denunciau calencuna diri fait sa presidenti de s'Arpas, Gisella Trincas – no at agatau solutzionis aintru de su sistema sanitàriu púbblicu. Una personi chi dimandhat agiudu a su serbítziu de saludi mantali po superai a sa crisi [...] s'agatat 'aghillia' in d'una cella".