Puru s’Mps contra a Marchionne: “Seus cun is traballadoris Fiat chi agguantant”. Lúnis in Tarantu cun is pastoris de Meridioni

(IlMinuto) – Casteddu, 12 de su mes''e gennàrgiu - "Nos seus cun is traballadoris de sa Fiat chi agguantant e lotant po difèndiri is diritus tentus cun cussas batallas chi ant portau a un'ammanniamentu civili e culturali". Dd'at nau su leader de su "Movimento Pastori Sardi", Felice Floris, custu mangianu in Casteddu po s'udiéntzia de su processu a is tres pastoris de Mps, arrestaus in is càrrigas de is carabineris e de sa politzia de su 19 de su mes''e ledàminis de su 2010. "Cussu de Marchionne - precisat Floris - est un'arracatu. Ita ant a podi mai votai cussus traballadoris? Ant essi obbligaus a nai eja po no perdi su postu 'e traballu". S'"acasàgiu" chi Mps at agatau in Civitavecchia no frenat a su Movimentu. "Eus a sighiri - precisat Floris - a costruiri su Cordinamentu de is pastoris de su Mediterraneu. No scéti, lúnis chi benit eus a essi in Tarantu po un'atóbiu cun is pastoris sicilianus, abruzzesus, calabresus, campanus e de sa Basilicata". Puru custu mangianu furiant assumancu 50 is pastoris a fac''e su Tribbunali de Casteddu, po unu sit in de solidariedadi a is tres pastoris. In s'àula de pratza Repúbbrica funti stetius intendius de is partis cuatru testimóngius presentaus de su Púbblicu ministeru. Sa difesa de is allevadoris de Mps at presentau in veci unu rolu longu de testimóngius, chi ant essi interrogaus in is udiéntzias chi benint. Su processu at a torrai a pigai su 20 de su mes''e arbili a is 11.30.