“Perígulu possíbbili po sa saludi púbblica”: serrau s’arenàrgiu de Pratamona a pustis de su sciàsciu ambientali. Sni: “Remborsu e bunífica”

(IlMinuto) – Casteddu, 14 de su mes''e gennàrgiu - Funt assumancu 10milla is litrus de ollu combustìbili arrutus in mari a pustis de sa segadura de una pompa de scàrrigu de una nai chi, martis passau, sciurmada in Pòrtu Turre, donàt furnimentu a sa centrali E-On de Fiume Santo. S'impestadura at trisinau totu su litorali de sa Tramuntana occidentali de s'Ísula, de sa Marina de Sòssu fintzas a Casteddu Sardu. De oi no at essi possíbbili intrai a is arenàrgius de Pratamona. Su síndhigu de Tàtari, Gianfranco Ganau, at fattu unu pregoni po sa serradura de s'area. Is ténnicus de su cumpartu Políticas ambientalis - si ligit in d'una nota de imprenta de su Comunu - ant difatis "perificau in s'arenàrgiu sa preséntzia de intippiduras e grumus de cabori murenu e de diversas mannàrias, cun d'unu perígulu possíbbili po sa saludi púbblica". Sa Procura de sa Reprúbbica de Tàtari at obertu un'inchiesta po avreguai a is causas de su sciàsciu e custu mangianu sa Cummissioni ambienti de sa Provìtzia at a fai un'ispetzioni in is logus corpius de sa pérdida de ollu combustìbili. "A pustis de un'àteru fatu de impestadura ambientali - cummentat cun d'una nota sa segreteria provintziali de Tàtari de Sardigna Natzione – pensaus chi siat arribbada s'ora de incarrerai unu pranu de bunífica de su territóriu, de pediri chi bengant donaus debressi is remborsus giustus, chi bengat stimau acoitu su dannu a s'ambienti nostru po mori de custu modellu de isvilupu chi no est cumpatìbili cun s'habitat nostru".