Cínema: Argentina protagonista de s'Asuni Film Festival. Novidadi tataresa cun Pereira

(IlMinuto) – Casteddu, 25 de su mes''e gennàrgiu - At essi su cínema argentinu su protagonista de sa sesta editzioni de s'Asuni Film Festival, in programma de 28 a su 30 de su mes''e gennàrgiu in Asùni e in Làconi (in provìntzia de Aristanis), a pustis de una dópia novidadi, gióbia 27, in Tàtari e in Aristanis.

Comenti sémpiri in su coru de sa rassigna ddoi ant essi is realidadis cinematograficas "de frontera". "Unu sceberu de campu - si ligit in d'una nota de imprenta - acapiau a is obbietivus prus importantis de s'assótziu culturali 'Su Disterru', inventora e curadora de su festival, de sémpiri sensibili a is temas de su disterru (in Asùni est impignada in sa creatzioni de unu Museu e de unu centru de documentatzioni asuba de is "sardus de foras")".

Tra is stràngius ddoi ant essi unus cantu testimóngius importantis de su cínema argentinu, comenti is registas Miguel Pereira, Marco Bechis, Juan Taratuto, chi ant a contribuiri a contai su continenti sudamericanu e a aprofundai is temas de is film in programma. At essi Pereira a oberri su Festival in sa novidadi tataresa, cun sa proietzioni de "La Deuda interna" (10.30, Saba umanistica de sa Facoltadi de Líteras E Filosofia), istoria de un'amigàntzia tra un'indìgenu e unu maistu de campagna chi finit cun s'iscópiu de sa gherra de is ísulas Falkland.