50millionis de chilus de arrefudus ispecialis in su portu de Aristanis? S’interrogatzioni de Madau (Repubricanos)

(IlMinuto) - Casteddu, 17 de su mes''e gennàrgiu - "Beneus a sciri atressu de s'imprenta ca sa sotziedadi Portovesme Srl, de su grupu Glencore, iat a tenni intentzioni de impitai su portu de Aristanis po stuai is matèrias primas necessàrias po su funtzionamentu de s'istabilimentu de Portovesme". Est cantu denunciat cun d'una interrogatzioni su consilleri provintziali de Sa Costituente Sebastian Madau. Su rapresentanti de is Repubricanos narat no a su scàrrigu de is arrefudus ispecialis in Aristanis. "In su portu de Aristanis - acrarat su consilleri indipendentista - iat a essi possíbbili fai apobiai nais de 3millionis de chilus, a su contràriu de canti acontéssit in Portovesme, aundi custu no est possíbbili. Is matérias primas impitadas de sa sotziedadi Portovesme Srl funt cussu chi si lamant fumus de iscallatóriu, berus e próprius arrefudus ispecialis ch'impestat meda a su logu e chi funt perigulosus". "Sa cantidadi de fumus de iscallatóriu chi iant a podi essi stuaus in su portu - precisat Madau - iant a podi arribbai a 50millionis de chilus a s'annu. Po custu dimandhu a su Presidenti e a s'assessori a s'ambienti si connosciant custus pranus industrialis"