Is traballantis Geas bullant a s'acórdiu Trenitalia-Medigas-Coop serbítzius. "Bolleus is stipendius chi si depint" Ferruvias a sa paràlisi

(IlMinuto) – Casteddu, 8 de su mes''e paschixèdda - Sighit sa batalla de is 114 traballadoris Geas chi allichidiànt is trenus. Batalla fatta custa, po otèniri su pagamentu de is stipendius arretraus e sa salvaguàrdia de totus is postus de traballu. Ariseru a merì is traballantis ant nau no a s'acórdiu tra Trenitalia, Medigas e Coop Serbítzius (aziendhas chi ant a depi remplasai a sa Geas). S'acórdiu previdit de pigai a totus is traballadoris, ma Trenitalia s'arrefudat de pagai is stipendius de su mes''e austu, de su mes''e cabudanni, de su mes''e ledàminis e de su mes''e totussantus: una cunditzioni de foras de conca po is traballadoris e po is sindacaus. Oi (atzetuau s'interventu de su Prefetu) su sistema ferruviàriu de s'Ísula at essi duncas totugantu frimmu: in diris de festa sa lei no previdit difatis nesciunu bus de remplasu o trenu garentiu.