Tiddia (Rsu Carbosulcis): “Minadoris prontus a sa lota. Cherchi arrespetit is prumissas”

(IlMinuto) – Casteddu, 7 de su mes''e paschixèdda - "Asseguru chi si is prumissas de s'assessori regionali de s'Industria, Oscar Cherchi, po torrai a ponni in motu s'atividadi de sa Carbosulcis no ant essi arrespetadas, eus a essi prontus comenti sèmpiri a sa mobilitada e a is formas de lota chi s'ant biu sèmpiri protagonistas". Est cantu afirmat cun d'una nota Antonello Tiddia, Rsu Carbosulcis. "Tengu dúbbius mannus meda - precisat Tiddia - asuba de is afirmaduras bessias in s'imprenta aundi s'assessori regionali a s'Industria Oscar Cherchi torrat a promovi su craboni de su Surcis. Custu poita fintzas a immoi apu intendiu de diversus personàgius políticus scéti prumissas e pagus fatus". "Su caiddu est a cucuru - concluit su "Minatore Rosso" - comenti imbasciadori Rsu Carbosulcis, no possu prus agguantai chi su tempus de oi e su futuru economicu industriali de custu territoriu possant essi ostàgiu de mecanisimus burocraticus pagu crarus e de istitutzionis po su prus ausentis. Arregordu a cussus chi tenit sa mamória crutza ca, dógnia borta ca nos minadoris si seus mobilitaus, dd'eus fattu po pediri no scéti traballu e salàrius segurus po is famílias nostras, ma una política industriali chi no fulit a mari una risorsa materiali comenti su craboni e una risorsa culturali comenti cussa chi eus assumau in cent'annus de istoria e de lotas minerarias".