Statutu nou: Cristiano Sabino (aMpI): “Centru destra e centru sinistra unias po un’àtera ‘fusioni perfeta’ cun s’Itàlia”

(IlMinuto) – Casteddu, 7 de su mes''e paschixèdda - "No a su tentativu de un'àtera 'fusioni perfeta' cun s'Itàlia!". Aici s'imbasciadori natzionali de a Manca pro s'Indipendentzia, Cristiano Sabino, bullat a s'acórdiu tra is fortzas políticas de centru destra e de centru sinistra in Consillu regionali asuba de sa scritura noa de su Statutu autonomisticu sardu. "Cun duas astensionis (a dógnia modu nesciunu contràriu) - arregordat Sabino – su votu esti stetiu cuncórdiu". "Sa sinistra indipendentista – precisat s'imbasciadori de aMpI – no cundividit custu fervori e avisat a is traballadoris sardus de su perígulu incombenti chi partit de sa classi política italianista chi po sa beridadi bollit scéti torrai a vernissai s'istoricu assuermamentu suu a s'istadu centrali. Assisteus a su tentativu de sbuidai de sensu cuncetus políticus meda crarus comenti 'soverania' e 'indipendentzia' e de esclúdiri de custu importanti dibbàtidu is chiostionis fundamentalis chi pertocant su blocu de s'isvilupu de s'economia nostra po mori de su stadu coloniali". "S'est formendi unu 'partidu italianu' traversali a is formatzioni de su centru destra e de su centru sinistra – acrarat Sabino – chi bollit fai un'òpera scheta de ingigneria istitutzionali po donai s'impressioni chi calincuna cosa cambìt e po straviai sa sardadura tra movimentu indipendentista e lota de classi in Sardigna".