Sa lota de Mps atraversat su Tirrenu. Floris: “Forsis cida chi enit andaus in Roma”. Torrau a spostai su processu a is tres pastoris

(IlMinuto) – Casteddu, 9 de su mes''e paschixèdda - Sa protesta de Mps no si frimmat. "A sa circa de interlocutoris prus atendibbìlis", cida chi benit su movimentu guidau de Felice Floris at a atraversai su Tirrenu po portai sa batalla de is pastoris sardus "in continenti". Ddd'at acrarau custu mangianu Felice Foris a fac''e su Tribbunali de Casteddu a pustis de un'àtera atrassadura de su processu a is tres allevadoris sardus arrestaus su merì de su 19 de su mes''e ledàminis po mori de is càrrigas de sa Politzia in bia Roma (custu po sa notífica mancada de unu decretu de citazioni). S'atrassadura est po s'12 de su mes''e gennàrigiu de su 2011. In pratza Repubblica furiant pagu prus de 100 is "maglietas blu" arribbadas a donai sa solidariedadi insoru a is pastoris chi depint essi processaus. "Su 'Movimento pastori sardi' - at acrarau Floris – andat ainnantis. Po cida chi benit teneus in programma una mobilitada in continenti, forsis in Roma. In Sardigna eus agatau scéti interlocutoris fraissus, chi sighint a torrai a propòniri is mantessi arretzetas callentadas. Is pastoris sardus pedint in veci unu cambiamentu radicali e chi disignit una prospetiva diversa, adata a is tempus modernus".