Contienda Geas: adóbiu prefetu-Trenitalia in Roma. Fed e aMpI contra a sa precetazioni

(IlMinuto) – Casteddu, 13 de su mes''e paschixèdda - Diri de atesa po is traballadoris Geas. Custu merì su prefetu de Casteddu, Giuseppe Balsamo, at a atobiai in Roma a s'amministradori delegau de Trenitalia, Vincenzo Soprano. Is addetus a sa manuntenzioni e a sa netesa de su sistema ferruviariu - senz''e stipendiu de cuatru mesis - abetant novas bonas. In su trastempus, acabbada sa precetazioni de 72 oras, in Tàtari is traballadoris Geas ant decidiu de torrai a su traballu, mentris cussus de Casteddu no ant bófiu torrai a pigai su serbítziu, nonostanti is indicus sindacalis. A is addetus de sa netesa est arribbada sa solidariedadi de sa "Federazione della Sinistra" e de aMpI. "In su mentris chi is traballadoris Geas sighint - scririt su Diretivu natzionali de a Manca pro s’Indipendentzia – sa protesta insoru ammaletzendu in Tàtari puru de si nci ghetai de sa crabatura de s'istatzioni, s'indipendentismu depit arregolli s'isfida e torrai a fai bolai cun fortza su progetu de su Partidu de is traballadoris sardus. Depeus tenni sa capacidadi de trasformai is traballadoris nostrus in d'una fortza manna de cambiamentu políticu po segai cun s'Itàlia, cun is fabas suas e cun medas e medas prumissas. Cun s'indipendentzia ant essi is traballadoris a precetai a is prefetus".
Contra a sa precetazioni puru Gianni Fresu (Prc) e Claudio Giorgi (Pdci) de sa "Federazione della Sinistra". "Postus cun is pabas a su muru, senz''e stipendiu e cun d'una possibbilidadi meda pitica de parti de s'aziendha de ddus torrai a pigai a traballai - narant is rapresentantis de sa Fds - is traballadoris benint precetaus de su prefetu e obbrigaus a torrai a su traballu! Si parrit una pàgini meda mala pigada de su períudu fascista no un'episodiu de gherra sociali meritosu de unu stadu democràticu".