Concertus: in Nùgoro sa fantasia de Enzo Favata, Marcello Peghin e Daniele Di Bonaventura

(IlMinuto) – Casteddu, 21 de su mes''e paschixèdda - Apuntamentu cun sa grandu música. Lúnis 27 de su mes''e paschixèdda a is 21.00 su teatru Eliseo at a aghilliri sa fortza manna de s'esperiéntzia de tres grandu nòminis de s'iscena internatzionali. Asuba de su palcu nugoresu at a artziai difatis su triu Caracas Cafè, formau de Enzo Favata, Marcello Peghin e Daniele Di Bonaventura. S'aspetadori at a assisti a un'ispetàculu aundi su jazz s'at a abbratzai cun sa música latinu-americana e cun cussa sarda, donendi vida a sonus chi s'ant a movi de su Mediterraneu a su Sud America. In su concertu - si ligit in d'una nota - "si podint immaginai istorias de is tzilleris prenus de fumu de Caracas e Buenos Aires, contus de aventuras amazzonicas, paesàgius brasilianus e su fragu de is portus abbitaus de Corto Maltese". Unu triu istraordinàriu chi at a regalai duas oras intensas de música meda bella, ocasioni aundi i sonus de sa milonga, su tangu e is dantzas brasilianas s'ant intriciai a is músicas de sa Sardigna.