“Chini lassat a solus is giòvanus ddus mandat a su maceddu”. Sa solidariedadi de Pcl a is istudiantis de su Liceu scientificu

(IlMinuto) – Casteddu, 17 de su mes''e paschixèdda - "Cust'inzénneru nou chi si nd'est pesendi, ammostat de tenni meda prus coràgiu, cuscéntzia, e interessu po su tempus benidori de s'iscola púbblica e de s'istrutzioni de totus e po totus, in su stadu italianu, de cantu funt fendi biri maistus e mannus". Cun custus fueddus su cordinamentu regionali de su "Partito comunista dei lavoratori" espressat "totu sa solidariedadi sua a is istudiantis de su Liceu scientificu Fermi in Nùgoro, imbrillonaus e sbaratzaus cun bregúngia po manu de is fortzas de s'órdini, e cundennat senz''e torrada su sbaratzu e s'arrestu de is istudiantis". Mérculis a mangianu, a pustis de dexi diris de ocupatzioni contra a sa riforma Gelmini, is fortzas de s'órdini ant fattu un'atzochiada in s'istitutu superiori prus mannu de sa provìntzia de Nùgoro cun s'obbietivu de frimmai sa mobilitada,  ponendi is ferrus a duus piciocus. Su Pcl sardu acusat a is maistus, a is presidis e a is sindacalistas de "tontímini amministrativu e fraissinu" e narat de "lamai cantu primu una manifestada provintziali contra a su scontróriu". "Custus amministradoris tostaus chi si prenint sa buca de democrazia, cultura e istrutzioni - scririt su Cordinamentu regionali - ant blocau fintzas a immoi dógnia manifestada decidia de totu sa classi traballadora contra a s'atacu prus grai, chi s'ammentit, fattu a su diritu a s'istudiu. Chi at lassai a solus is istudiantis a afrontai custa lota at essi complici e acitotu culpàbili de ai mandau un'inzénneru nou a su maceddu"