Aciocu tra is capus mannus de Irs. Esecutivu a Sale: "No eus a permiti chi si ndi liit sa democratzia"

(IlMinuto) – Casteddu, 8 de su mes''e paschixèdda - Est sèmpiri prus arta sa tensioni tra s'Esecutivu natzionali de Irs e su presindenti Gavino Sale. Cun d'una nota de imprenta firmada de Gianmaria Bellu, Pasquale Cadau, Sebastian Madau, Salvatore Acampora, Gabriele Littera, Juanneddu Serra, Salvatore Carvone e Omas Onnis, s'Esecutivu "pigat atu de sa convocatzioni de un'assembrea istraordinària firmada de su presidenti Gavino Sale e mandada scéti a doxi sócius chi de fatu ndi liat sa soverania de is ativistas". S'Esecutivu acusat a Sale de bolli fèrriri a sa democratzia interna a s'organitzazioni política indipendentista "in nòmini de diritus de erentzia". "No ddoi est - precisat su comunicau - nesciuna possibbilidadi de lamai organus chi no siant espressioni bera e crara de s'Assembrea de is ativastas. S'Esecutivu natzionali at a portai ainnantis su mandau fintzas a s'assembrea eletiva de su duus de su mes''e gennàrgiu de su 2011, no at a permiti nesciuna suspensioni de is processus democràticus chi si funt tenendi".