Scola. Filcams Cgil: in Sardigna 750 traballantis (ex lsu) arriscant su postu de traballu in is serbítzius de netesa “po mori de is tàglius de su Ministero”

(IlMinuto) - Casteddu, 1 de su mes''e totussantus - Arriscant de perdiri su traballu is 750 traballantis (ex traballantis útilis po sa sociedadi) chi de su 2001 pulint is iscolas de totus sa Sardigna. Is tres cunsórtzius chi aprontant is apaltus ant difatis giai cumenzau is pràtigas de lissentziamentu po mori de is tàglius de su Ministero dell'Istruzione, dell'Università e della Ricerca. A ddu comunicai est una nota de imprenta de sa Filcams Cgil. "Is traballantis chi no funt prus precàrius po mori de essi passaus a is is cunsórtzius de is apaltus de netesa - denunciat sa segretària regionali Simona Franzecco - oi non tenint nisciuna certesa de sighiri su traballu insoru, mentris is traballantis de sa Pubblica Istruzione, giai brassàglius de taglius meda malus, arriscant de aciungi ancora prus traballu a cussu chi faint giai". Sa mancàntzia de su dinai destinau a sa netesa - finit Fanzecco - no lassat pensai a nudda de bellu - S'ùnica certesa chi teneus est chi is impresas de is serbítzius ant cumentzau is pratigas de lissentiamentu po totus is traballantis sardus. Custa cosa at essi pagada de is famílias e de is istudiantis chi ant a depi andai in asilus, iscolas elementaris e superioris senz''e tenni unu giustu serbítziu de netesa".