Pastoris asuta de processu: sit in a fac''e su Tribbunali. Custa cida forsis manifestada in sa Saras. Solidariedadi de aMpI

(IlMinuto) – Casteddu, 17 de su mes''e totussantus - "Su fueddu donau po su pastori, diversamenti de cussu de chini guvernat, tenit unu valori sacru". Aici si ligit in s'últimu artículu insertau in su giassu uficiali Mps. Custa cida is pastoris ant a torrai in istrada (gióbia o cenàbara forsis a fac''e s'istabilimentu de sa Saras de Sarròccu, segundu candu arrallatau de su telegiornali de Videolina) po dimandai s'arrespetu de is impignus pigaus de sa Giunta regionali e s'apricu de su pranu in 12 puntus.
"No bolleus prus - precisat Mps - chi s'assessori fazat su bellu bellu in faci, cuedusì apabas de fueddus bellus e fattus mìserus. Is pastoris no si meritant nesciuna pigada po culu". Custu mangianu in Casteddu s'at a tenni su processu a is tres allevadoris frimmaus su 19 de su mes''e ledàminis. In programma unu sit in Mps a fac''e su Tribbunali. A is pastoris asuta de processu est arribbada sa solidariedadi de a Manca pro s’Indipendentzia. "Unu Tribbunali italianu - si ligit in d'una nota de su Diretivu políticu natzionali - at a giudicai a is tres pastoris scutus e arrestaus su 19 de su mesi passau de sa politzia italiana. A Manca pro s’Indipendentzia s'unit a sa solidariedadi a is pastoris asuta de processu e denunciat su fattu chi in realidadi a andai asuta de processu po sa violetzia foras de contu ant a depi essi su Cuestori e su Vicicuestori responsabbilis de is trambullus e responsabbilis puru de ai fattu perdi un'ogu a unu pastori".