Lei 162. Di Biase (Cgil): "Tàglius po 25 millionis de eurus. Dannus meda grais a personis chi sufrint de discumbénius grais"

(IlMinuto) – Casteddu, 8 de su mes''e totussantus - "Su modu de fai de s'assessori Liori in s'acontéssia chi pertocat s'assistu a chini tenit disabilidadis no si podit acetai". Est cantu denunciat cun d'una nota sa segretària regionali de sa Cgil Marinora di Biase. Sa sindacalista imbidat su rapresentanti de sa Giunta regionali a arrespetai s'impignu a no limitai is risorsas po is políticas socialis, po su prus a ndi liai su dinai po is pranus de assistu a is disabilis de sa lei 162 . "Limitai ocannu sa disponibilidadi de su dinai a 91 millionis mentris s'annu passau si furiant donaus 116 millionis - precisat su prapresentanti de sa Cgil - est scéti a ndi liai dinai". "Sa delíbbera regionali de su 18 de su mes''e ledàminis - precisat Di Biase - esti stetia scrita senz''e meda conca poita fait unu dannu grai a personis chi giai sunfrint de discumbénius grais, senz''e ofèrriri nesciuna solutzioni a is 'mabis' insoru".