Eurallumina: oi assembrea Rsu. Pcl: "Nazionalitzai e creai una filiera de s'allumíniu in su Surcis-Igresienti"

(IlMinuto) – Casteddu, 15 de su mes''e totussantus - Assembrea noa po is traballantis de Eurallumina. A pustis de su rinviu "a data ancora de fissai" de s'atóbiu in sa sedi de su Ministeru de su "Sviluppo economico" previdiu po su 9 de su mes''e totussantus, custu mangianu is Rsu de s'aziendha e de is impresas de apaltu s'ant a reuniri in Portovesmi po valutai is novas chi benint de s'assessorau de s'"Industria" e de su Mise e po - si ligit in d'una nota - "aprontai sa mobilitada giusta, si fessat necessàriu". Asuba de sa contienda fueddat puru sa setzioni casteddaia de su Pcl. Su Partito comunista dei lavoratori proponit sa nazionalizatzioni de Eurallumina e sa creatzioni de una filiera de s'allumíniu in su Surcis-Igresienti. "S'Eurallimina andat nazionalitzada", scririt su Pcl. "Custu - precisat una nota de imprenta - est su momentu giustu po torrai a creai una bera e própria política de isvilupu po totu su Surcis-Igresienti, una politica chi fatzat una filiera de s'allumíniu chi trisinit a s'Eurallumina, a s'Alcoa e a s'ex Ila (giai serrada cun is traballadoris a travessu). Scéti custa podit essi una solutzioni difinitiva po su polu industriali de su Surcis-Igresienti".