Caminada indipendentista, aMpI: "Saludaus a sa boluntadi de cabai in pratza de dógnia sardu líbberu. Sa primu cosa po nos est s'arrexinamentu"

(IlMinuto) – Casteddu, 10 de su mes''e totussantus - "Su favori de medas sardus líbberus po sa bidea de una caminada indipendentista est unu de is medas signalis chi testificant ca sa cuscéntzia natzionali est crescendi e ca ddoi est una precisa boluntadi política de ammollai a su stadu italianu e de s'iscabbulli de su blocu coloniali". Cun custus fueddus su Diretivu políticu natzionali de a Manca pro s'Indipendentzia cummentat sa caminada po s'indipendentzia, in programma po su 27 de su mes''e totussantus in Casteddu. Sa manifestada esti stetia aprontada de unu cumitau autónomu formau de militantis indipendentistas, chi at eligiu comenti imbasciadori Filippo Grecu. Nonostanti s'apretziamentu sa formatzioni de sa Sinistra indipendentista no at a pigai parti, assumancu no dd'at a fai in modu organitzau, a sa cosa. "Mancai A Manca pro s’Indipendentzia siat stetia imbidada [...] - acrarat su Diretivu - no bideus útili in custu momentu stresiai su pesu de sa militantzia nostra. Sa sinistra indipendentista est difatis fadendi unu traballu de preséntzia e de arrexinamentu a tapetu in su territoriu e in is comunidadis, unu traballu chi po nos est strategicu". "A dógnia modu - concluit sa nota - saludaus a sa boluntadi de dógnia sardu líbberu de cabai in pratza a manifestai su própriu spéddiu a una Sardigna líbbera, indipendenti e soverana".