Apuntamentus: in Gèsigu "Il Popolo di bronzo", sa mostra de Angela Demontis

(IlMinuto) – Casteddu, 22 de su mes''e totussantus - De sàbudu passau Gèsigu aghillit, in is apusentus de su Centru Serbítzius S’Ulivariu, "Il Popolo di bronzo", mostra de s'artista Angela Demontis. Giai presentada in is aposentus de su Museu Archeológicu de Casteddu, s'aparada est su frutu de unu traballu prenu 'e amori chi, cun s'agiudu de sa Provìntzia de Casteddu, at portau ainnantis su progetu abbissiosu de torrai a costruiri in mannària realis is personàgius rapresentaus de sa statuaria nuraghina in brunzu. Is òperas funt cumpletas de bistimenta, armis e acessorius impitaus de is óminis e de is féminas de tremila annus fait. Cun cust'aparada - si ligit in d'una nota - "si bollit propòniri una possíbbili costrutzioni símili a sa realidadi [...] cun [...] ténnicas antigas de manígiu".

Su traballu est nàsciu de s'ossevatzioni rigorosa de is bronzetus cumentzada cun su líbburu 'Il Popolo di Bronzo', òpera 'e totu de Demontis.

Sa mostra, s'at a podi bisitai fintzas a su 30 de su mes''e totussantus, est su primu de is medas eventus culturalis chi sa Provìntzia de Casteddu bollit portai ainnantis in Trexenta. Custa circat difatis de sensibilizai a s'opinioni púbblica asuba de patrimoniu archeológicu stremenau chi oferit su territoriu, po avalorai su turismu culturali.

Po ndi sciri de prus e po is bisitas guidadas a sa mostra toca a si rivolgi a:

Comunu de Gèsigu: tel. 070987043 e-mail comunedigesico@tiscali.it

Proloco Gèsigu: tel. 070987124 e-mail: prolocogesico@tiscali.it

Coperativa Ghersakon: tel. 3404075448

Acli Gèsigu: tel. 0709877021, e-mail: acli.gesico@gmail.com