Apuntamentus. De Paglietti a Serra: in Tàtari sa mostra colletiva "Natale 2010"

(IlMinuto) – Casteddu, 17 de su mes''e totussantus - Puru ocannu Tàtari at a aghilliri sa mostra de Paschixedda de pintura sarda. Ant essi pagu prus de 70 is òperas aparadas in sa Galleria "Arte Spazio", in d'un'aparada manna chi at abarrai oberta a su púbblicu de su 5 de su mes''e paschixèdda a su 20 de su mes''e gennàrgiu 2011.

Sa pintura chi at a oberri sa mostra, torrendidda a costruiri in su tempus, est un'ollu asuba de masonite de su 1894 òpera de s'artista de Pòrtu Turre Mario Paglietti, retratista e pintori figurativu de sa fin''e s'Otuxentus. Su "Riposo" de Filippo Figari, de su 1909, at essi sa pintura chi at a oberri is ennas de su Noixentus e at a acumpangiai su bisitadori inderetura a sa rapresentatzioni de sa "Figura in Costume", òpera de su 1920 de Giuseppe Biasi, e de innoi a sa "Roccia del Supramonte" de Ballero e sa "Figura in costume" de Melkiorre Melis. Su caminu de s'aparada at a arribbai fintzas a is firmas de su panorama contemporaneu: Gianni Serra e is iscenas in costumu sardu, Aline Spada e Rodio cun su figurativu modernu, e a pustis ancora Andrea Bellino e Arru, Pazzola, Becca, Pittalis.

Sa colletiva "Natale 2010" s'at podi bisitai totus is diris de is 09.30 a is 13.00 e de is 16.30 a is 20.00 in sa Galleria "Arte Spazio", in bia Principessa Maria 29 in Tàtari. S'eventu est aprontau de sa Diretzioni de sa Galleria.