S’arràbbiu de is massaju blocat Casteddu. Coldiretti: “Seus stetius frigaus. Istitutzionis senz”e cuscéntzia: immoi tocat a dd’acabbai

(IlMinuto) – Casteddu, 13 de su mes''e ledàminis - Puru su mundu de sa massaria cabat in pratza. Custu mangianu funt milli e prus de milli is iscritus a sa Coldiretti, a sa Cia, a sa Copagri e sa Confagricoltura chi sfilant po is bias de Casteddu cun s'obbietivu de denunciai sa "crisi peus de is últimus carant'annus".  Su corteu, cumentazu a is 10.30 de pratza de is Centomila, at a arribbai a is 14.00 in carrela manna Trento, a fac''e su palatzu de sa Giunta regionali. "Sa massaria sarda e su mundu agro-pastorali - denunciat Coldiretti in d'una nota - funti stetius pigaus po tontus". "Su fattu chi si fait abarrai de prus a buca oberta - acrarat s'organizatzioni - est acontéssiu su 29 de su mes''e cabudanni passau in Roma, aundi eus assistiu a un'ispetàculu aggraviosu tra Regioni e Ministeru chi si passànt de borta in borta is responsabbilidadis, in d'una gherra istitutzionali de si ponni diaderus is manus in conca. Totu custu ammostat una totali auséntzia de responsabbilidadi de is istitutzionis, chi si ndi frigant de is arragus malus chi funt bivendi is pastoris sardus".