Referendum. In Teulada 500 contra a su nucleari. Mps: “In primu fiba in sa lota. Teneus a foras s’àliga”

(IlMinuto) – Casteddu, 11 de su mes''e ledàminis - Cumentzat cun d'unu rumóriu sa campagna de su Cumitau "Sinonucle" chi s'et tenendi abetendi su referendum regionali contra a su nucleari de su beranu chi benit. Ariseru in Teulada funti stetius casi 500 is personis chi ant nau no a sa preséntzia de centralis e depósitus de ferrinas in Sardigna participendi primu a sa cirimónia chi s'est tenta in sa pratza centrali de sa bidda e chi at biu ponni unu bronzixeddu nuraghinu a guardania de s'atomu e po acastiai su territoriu sardu. Totu sa genti a pigau parti a un'assembrea popolari in su paleddu de su Sport de sa bidda. Sa diri at registrau un'importanti intrada noa in su Cumitau. Ai is giai cai 150 organizatzionis políticas e sindacalis e a is movimentus, chi ant giai addiriu a su Cumitau cordinau de su leader indipendentista Bustianu Cumpostu, s'est difatis uniu su "Movimento pastori sardi" de Felice Floris, protagonista in custus mesis de diversas diris de lota. "Mps - at nau Floris - at essi in primu fiba in sa lota po su referendum. Eus biu ca in Sardigna arribbat meda àliga, a cumentzai de cussa chi bit protagonista sa cos''e papai. Su 'Movimento pastori sardi' s'at a bati contra a su nucleari e contra a dógn'àliga".

Importanti su relatu de Massimo De Santi, físicu nucleari presidenti de su "Comitato internazionale educazione per la pace". "Su nucleari - at precisau - est unu crímini contra a s'umanidadi. Si s'obbitivu insoru est fai una centrali o unu depósitu in d'una zona militaritzada, po esémpiu innoi in Teulada, at a tocai a s'arrepeddai, a segai i fius de sa basi e a intrai aintru".