Referendum. Cumitau Sinonucle: 'Acastiai a Teulada de su nucleari cun d'unu capu tribù nuraghinu'. Su 10 de su mes''e ledàminis in Teulada 'Sa die de sa vardania'

(IlMinuto) – Casteddu, 1 de su mes''e ledàminis - Su no a su nucleari in s'Ísula passat po Teulada. Abetendi a su referendum regionali de su beranu chi benit su Cumitau Sinonucle at aprontau po su 10 de su mes''e ledàminis chi benit "Sa die de sa vardania": "una festa de protesta una festa po si ndi torrai a pigai sa soverania" in cussu chi est unu de is comunus possibbilis po su fàbbricu de una centrali atómica in Sardigna.
S'eventu esti stetiu ammostau custu mangianu in d'una cuferéntzia de imprenta in Casteddu, asuta de is pórcius de su Consillu regionali in bia Roma, tra is bandheras de sa Confederazione sincale sarda, de s'Usb, de sa Federazione della sinistra, de Sinistra critica, de Sardigna Natzione, su pinnioni antinucleari de su Cagliari social forum e is cartellus de is Consumatori Sardegna e de su Cumitau scuola Città Cagliari. "In Teulada - at acrarau su cordinadori de su Cumitau Bustianu Cumpostu - at essi 'prantau' unu bronzetu nuraghinu-capu tribù a acastiai su territoriu de Teulada e su pópulu nostru".