In primu pranu: lota de is pastoris. Zuncheddu (Rossomori): "Violéntzia senz''e torrada. Ghetadura de lacrimogenus a artesa de ómini"

(IlMinuto) – Casteddu, 20 de su mes''e ledàminis - "Is càrrigas de is fortzas de s'órdini funti stetias de una violéntzia senz''e torrada, de foras de conca e po medas motivus incomprensìbbilis a fac''e is pretesas de su Mps". Est cantu afirmat cun d'unu comunicau de imprenta su consilleri regionali de is Rossomori Claudia Zuncheddu, testimóngiu diretu de is fattus de ariseru a merì. "Eus biu - precisat sa rapresentanti de is Rossomori - sa ghetadura de is lacrimogenus a artesa de ómini, agiummai tochendi sa tragédia tra is manifestantis e sa genti chi furiat passendi. Unu giòvanu est a arriscu de pèrdiri un'ogu". "Giai de mangianeddu - acrarat Zuncheddu - is pullman de is pastoris chi arribbànt in Casteddu beniant blocaus, cumpudaus e rallentaus, a su puntu de fai cumentzai prus a tradu sa manifestada. S'únicu 'delitu' fattu de su Mps in custus mesis, cun is manifestadas suas, est cussu de fai connosci a sa genti de totu su mundu is 'ingànnius' chi si funt fadendi a is dannus de totu s'economia traditzionali sarda, a cumentzai de s'importatzioni senz''e controllu de sa petza prodúsia a foras de sa Sardigna".