In primu pranu: lota de is pastoris. Sa denúntzia de aMpI. "Allevadori de Sarule pistau de sa politzia"

(IlMinuto) – Casteddu, 22 de su mes''e ledàminis - "In su noti de su 19 de su mes''e ledàminis, unu pastori de Sarule chi fait parti de s'Mps e chi torrada a domu a tradu mannu a pustis de sa manifestada de Casteddu cun ancora in pitzus sa maglieta blu de su Movimentu, esti stetiu frimmau de una patrúglia de sa politzia italiana in s'iscasciadorzu de Otzàna . Esti stetiu imbidau a donai is documentus e a acrai de aundi furiat arribbendi. Su pastori s'est arrefudau de arrespundi a cussu chi furiat a totus is efetus unu pregontu e esti stetiu arropau de mala chinta. A pustis esti stetiu portau in caserma, e ingunis esti stetiu fattu ogetu de àterus cropus, infatu esti stetiu lassau in d'un'ispidali, e de innoi at lamau s'abbogau e is parentis". Est cantu debunciat cun d'unu comunicau de imprenta su Diretivu políticu natzionali de a Manca pro s’Indipendentzia. "A Manca pro s’Indipendentzia – precisat sa nota - est in totu e po tou acanta de su militanti de su Mps scutu de mala chinta de is politziotus, e est acanta de totu su Movimentu chi at patiu s'aciocada mala aprontada cun càlculu de sa politzia italiana in sa manifestada de su 19. Est craru a totus ca a pustis de una primu fasi de osservatzioni sa politzia e sa classi política de 'mamma' Itàlia ant decídiu de acusai sa lota de is pastoris po ispèrdiri s' immàgini bona chi su Movimentu at donau de cussu  'e totu a su pópulu, custu gratzias a unu camminu longu e intelligenti, unu camminu de lotas e de assembreas fattas cun sa genti".