In primu pranu: lota de is pastoris. aMpI smincit a su cuestori Mulas. "Tra is arrestaus un'iscritu nostru? No si parrit. A Manca presenti a dógnia manifestada de Mps"

(IlMinuto) – Casteddu, 21 de su mes''e ledàminis - "Eus scipiu de is fueddus de su cuestori de Casteddu Salvatore Mulas ca tra is arrestaus a sa manifestada de su Mps, ddoi est unu bugoni, est a sciri un'iscritu de A Manca pro s’Indipendentzia. Custu po immoi no s'arresurtat". Est cantu afirmat in d'una nota su Diretivu políticu natzionali de aMpI, smicendu a is púbblicas dichiaras lassadas ariseru de Mulas. "Eus notau - iat difatis nau ariseru su cuestori - sa preséntzia antipàtica e preocupanti de unus cantu sugetus. Unu esti stetiu puru arrestau, unu chi fait parti de a Manca pro s'Indipendentzia e puru àterus sugetus chi fadiant parti de un'àteru mundu, meda acanta a sa sinistra prus a sinistra". "S'arràntzia fatta martis de is fortzas de ocupatzioni italianas - precisat aMpI - at acrarau esatamenti cali funt is términus de is raportus de fortza tra is traballantis nostrus chi manifestant e su stadu italianu. Sa violéntzia insoru, s'incanimentu insoru esti stetiu giustificau cun s'istoria de sèmpiri, cussa de is bugonis. A Manca no furiat ingunis a fura e comenti totus is àteras bortas at pigau parti a sa manifestada. S'organizatzioni nostra at participau cun d'una delegatzioni a totus is manifestadas chi s'Mps at biu necessarias de aprontontai. Esti stetia sèmpiri presenti in su totali arrespetu de is arrégulas de su movimentu e de is métudus sceberaus po mandai ainnantis sa lota. Agiudendi dógnia sceberu fattu fintzas a oi".