In primu pranu: lota de is pastoris. aMpI: "Sa diri de ariseru acrarat sa faci bera de su stadu italianu"

(IlMinuto) – Casteddu, 20 de su mes''e ledàminis - "Sa diri de ariseru acrarat medas cosas. Acrarat de calli parti staint is políticus regionalis (ndi liaus scéti calencuna ecetzioni!) chi oi funt solidaris cun is politziotus. Acrarat de calli parti stait sa politzia italiana chi at ammostau sa faci bera chi si tragat, cussa de fortza de ocupatzioni coloniali! E prusatotu acrarat sa faci bera su stadu italianu intentzionau a destruiri s'economia sarda po gestiri mellus un'ísula morta duncas maseda". Est cantu afirmat in d'una nota de imprenta su Diretivu Políticu Natzionali de A Manca pro s’Indipendentzia. "Est Doverosu acrarai - precisat s'organizatzioni indipendentista - ca esti stetia sa politzia a provocai po primu is manifestantis, fadendi cumpudus grais chi ant fattu cumentzai prus a tradu su corteu, esti stetia sa politzia senz''e tenni motivus a trumentai is ànimus. Arribbaus in su palatzu regionali is pastoris ant circau de intrai in cussu chi iat a depi essi su palatzu de su pópulu sardu. Is trupas bardadas de gherra ant reagiu de su primu momentu a is strecadas cun puntadas de pei e ispintas partedi a s'atacu primu de s'ora 'e prandi, e no scéti a su merì a tradu comenti scrìnt is giornalis". "Abbellu abbellu - acrarat su testu - is acolladas si funt fattas sèmpiri prus mabas e no de seguru po evitai is tentaivus de irfundhadura de is manifestantis. Calencunu pastori est arrennesciu a ocupai s'àula de sa cummissioni "Bilancio", po dimandai debressi s'aprou de sa lei asuba de su "de minimis" (unus de is 12 puntus de sa piataforma) promítia de sa Regioni de meda tempus e mai incarrerada! In totu arrespusta is manifestantis funti stetius frimmaus, schedaus, scutus scéti po ai circau de fortzai un'intrada laterali de su palatzu de su Consillu regionali".