Presonis. Caligaris (Sdr): “Trebeas grais a su diritu a sa saludi de is presoneris e dannus po su stadu. Portaus s’acuntéssia in Tribbunali”

(IlMinuto) – Casteddu, 11 de su mes''e ledàminis - "Su bloccu frimmu a s'ispesa sanitaria, cun in prus sa trebea de su diritu a sa saludi po is presoneris e a àterus sacrifitzius po is agentis de sa polizia de is presonis, fait unu dannu mannu a su stadu". Ddu narat cun d'una nota sa presidenti de Socialismo Diritti e Riforme, Maria Grazia Caligaris. Cun s'assistu de un'abbogau, s'assótziu est aprontendi un'espostu a is Procuras de sa Repúbbrica de is Tribbunalis interessaus poita perifichint eventualis responsabbilidadis in sa lota tra sa Regioni e su Ministeru de sa "Giustizia". "Est de fora de conca - concluit Caligaris - ca si possat abetai sa solutzioni de su cundierra Regioni-Ministeru de sa 'Giustizia' in auséntzia de unu provedimentu straordinàriu e apretosu po torrai a ponni s'assistu comenti furiat primu fintzas a su 31 de su mes''e paschixèdda, candu sa cumpeténtzia de sa sanidadi de is presonis at a passai a su serbítziu sanitariu regionali. Iat a essi comentesisiat aggraviosu, po una Regioni a Statutu ispeciali comenti sa Sardigna, sa nómina de parti de Guvernu natzionali de unu cummessàriu ad acta".