Presonis. Caligaris (Sdr): ‘Incostitutzionali s’irminorigamentu de s’assistu sanitàriu’. Sa cosa in sa mesa de Napolitano

(IlMinuto) – Casteddu, 7 de su mes''e ledàminis - "Su dràsticu irminorigamentu de s'assistu sanitàriu in is presonis de sa Sardigna e sa serradura de is Centrus clinicus de Buoncammino in Casteddu e de San Sebastiano in Tàtari funt atus incostitutzionalis in is cunfrontus de citadinus chi no tenint sa libbertadi ma chi iant a depi tenni unu diritu, cussu a sa saludi, scritu in sa Costitutzioni". Ddu narat cun d'una nota Maria Grazia Caligaris, presidenti de s'assótziu "Socialismo Diritti Riforme". Sa rapresentanti socialista denunciat su dinai liau a is serbítzius previdius de su "Pranu apretu sanidadi", ativu de oi e fattu po mori de s'auséntzia de dinai."A fac''e sa mudesa de is istitutzionis - precisat Caligaris - S'Assótziu est aprontendi is atus necessàrius po una sùplica a su Presidenti de sa Repúbbrica, po recursus a is Procuras interessadas e a is autoridadis de giustítzia europeas. Est difatis de foras de conca ca nesciunu atu po torrai a fai bivi sa legalidadi in is presonis, siat stetiu fattu de sa Regioni o de su Guvernu chi s'inserrant apabas de fueddus pagu crarus asuba de  chini depit pagai su contu de s'assistu".