Pastoria. aMpI: "Mps lotat contra a su sciàsciu economicu e políticu de sa natzioni nostra"

(IlMinuto) – Casteddu, 11 de su mes''e ledàminis - "Is últimas mobilitadas faint biri cun craresa ca is pastoris no si limitant a dimandai s'aprou de is 12 puntus chi ant animau is prostestas de cust'istadi, ma puntant su didu contra a totu su sistema de sa cos''e papai fadendi biri ca su movimentu assumit sèmpiri de prus connotaus de saludi púbblica e natzionalis". Cun custus fueddus su Diretivu políticu natzionali de aMpI cummentat s'última mobilitada de su Mps. Cenàbara a mangianu su Movimentu de Felice Floris at difatis blocau is nais in su portu de Terranòa, rallentendi su sbarcu de is passegeris e blochendi is Tir, comenti cida passada in Pòrtu Turre. Una delegatzioni de A Manca furiat presenti a sa mobilitada fintzas de is primus oras de su mangianu. "In d'unu Tir - acrarat aMpI - esti stetiu agatau unu càrrigu de petza in cunditzionis meda malas, custa petza teniat adderetura fragu pudésciu e furiat pronta po essi intregada a Murru e po essi impitada po fai sartitzus".

"Seus a su costau de sa lota de is pastoris - concluit s'organizatzioni indipendentista e comunista - poita custa testimóniat ca ddoi est una grandu parti de su pópulu traballadori sardu chi no tenit intentzioni de s'arrendi a is lógicas de su colonialismu italianu e ca est pronta a s'organitzai e a lotai po impediri su sciàsciu economicu e políticu de sa natzioni nostra".