Lota de is pastoris. Sperantzia de Libertadi: "Mulas, Cappellacci e Prato: est ora de lassai s'incàrrigu"

(IlMinuto) – Casteddu, 25 de su mes''e ledàminis - Su cuestori de Casteddu, Salvatore Mulas, depit lassai s'incàrrigu debressi e sa mantessi cosa depint fai su presidenti de sa Regioni Sardigna, Ugo Cappellacci e s'assessori de s'"Agricoltura" Andrea Prato. Est cussu chi pedit cun d'una nota de imprenta Sperantzia de Libertadi, su movimentu de is giòvanus de Sardigna Natzione. "Po sa manifestada de su 19 de su mes''e ledàminis - si ligit in su comunicau - su Stadu italianu at fattu biri ancora una borta cun craresa sa volontadi chi tenit de scuntroriai a su pópulu sardu atressu de su tentativu de indebbilitai sa resisténtzia de is pastoris, est a nai de sa genti chi rapresentat su coru de sa chistioni sarda". "Biu s'auséntzia manna de abbilesa in su modu de gestiri una situatzioni chi giai si scidiat delicada e biu s'ameletzu patiu de is manifestantis fintzas de su primu momentu - concluint is giòvanus de Sni - Sperantzia de Libertadi cundennat su modu malu de fai de is fortzas de s'órdini. Po custu dimandaus a totus cussus chi ant contribbuiu a infestai s'acuntéssia, est a nai, a su cuestori Mulas (chi est puru responsabbili de su discréditu de su movimentu a Manca pro s’Indipendentzia) a s'assessori Prato e a su guvernadori Capellacci de lassai s'incàrrigu".