Lota de is pastoris. “Nesciuna limúsina”. Mps torrat in pratza in Casteddu a pustis de sa truncadura cun Cappellacci

(IlMinuto) – Casteddu, 28 de su mes''e ledàminis - Pastoris torra in pratza. A pustis de sa truncadura noa de is negoziatzionis cun sa Giunta regionali (arribbada arieru a merì a pustis de cinc'oras de cunfrontu in Villa Devoto) su Movimentu de is pastoris de Felice Floris at annunciau una manifestada noa in Casteddu po su 3 de su mes''e totussantus. Cras is allevadoris de Mps s'ant a agatai in Tramatza po aprontai sa mobilitada. Sa truncadura cun s'Esecutivu regionali est arribbada ancora una borta po mori de sa chistioni de is finantziamentus de minimis de 15milla eurus po aziendha. Un'àtera proposta esti arribbada de parti de su Presidenti de sa Regioni giai de su primu momentu in s'atóbiu - ant nau Floris e Ladu –  (de primu 2.500 eurus po ziendha e is àterus 5 milla intru Pasca Manna) . Custa proposta esti stetia pigada in cunsidériu de sa delegatzioni de Mps comenti "Una limúsina". "Sminciu - at nau a pustis Cappellacci cun d'una nota de imprenta - in dógnia modu presuntas ofertas fattas a su Movimentu pastoris, po su prus a títulu de limúsina. Puru poita de totu tenit bisóngiu sa pastoria nostra atzetuau ca de providimentus caridadosus".

In su trastempus at donau sa solidariedadi a Mps puru su grupu de artistas "forze disarmArti" chi de tempus ocupat s'Ex Cuestura de Tàtari. "Sa lota de is pastoris - scrirint - est sa lota de totus nos, lota po sa dignidadi de bivi e traballai, lota po is diritus elementaris de sa personi. Nos chi ocupaus unu logu púbblicu po ddu torrai a donai a sa citadi, po fai cultura, cuscéntzia e poita no, rédditu, seus cun su 'Movimento dei Pastori Sardi'".